மௌனத்தின் சத்தங்கள் ...!

மௌனம் சத்தம் போடுமா ?

சற்று மௌனமாகச் சிந்தித்ததில்

அது ஆம் என்றது சத்தமாக ..

என்னை விட்டுப் போய்விடுவாயா ?

எனக் காதலியிடம் கேட்டக் கேள்விக்கு

பதிலாய் வந்த மௌனம்இன்றும் மனதில் சத்தம் போடுகிறது ...

எம் இன மக்கள்

எட்டிய தூரத்தில் இருந்தும்

கொத்து கொத்தாய்ச் சாகையில்

இங்கு அமைதி காத்த மக்களின் மௌனம்

ஈழத்தில் குழந்தையின் அழுகையாய்க் கேட்கிறது ..

பேச வேண்டிய தருணங்களில்

நான் காத்த மௌனங்களே

இன்று வரை நினைவில் சத்தம் போடுகிறது ..

நான் திட்டிப் போன வேளையில்

மௌனம் காத்த தந்தையின் மௌனங்கள்

என்னைச் சத்தமாகக் குத்திக் காட்டுகிறது ..

உயிரெனக் கலந்த உறவுகள்

உயிரற்றச் சவமாகக் கிடக்கையில்

என்னில் கண்ணீராய்ச் சத்தம் போடுகிறது ..

இப்பொழுது சொல்லுங்கள்

மௌனம் சத்தம் போடும் தானே ..