என்னைத் தேடும் நினைவுகளுக்கு ..

என்னைத் தேடும் நினைவுகளிடம்

நான் என்ன சொல்ல வேண்டும் ?

உண்மைகள் பொய்த்ததால்

தொலைந்து போனேன் என்றா ?

தூரங்களில் உள்ள நியாயங்கள்

சில நேரம் கோபம் தரும்

காலம் தரும் பதிலில் மட்டுமே

அந்த நியாயங்கள் விளக்கம் பெறும்

இரயில் சன்னல் ஓரம்

வானம் பின் தொடர்கையில்

மேரி தாயின் முன் நின்று கொண்டு

தனியே அழும் மெழுகுவத்தியின் கண்ணீரில்

இரவில் உறக்கத்தில் தொலைந்து போகும்

என்னைத் தேடும் கனவுகளில்

வரவேற்பறை மீன் தொட்டிக்குள் வாழும்

ஒற்றைத் தங்கமீனின் தனிமையில்

இப்படி இவை அனைத்திலும்

உன் தேடல் தெரிந்தும்

நான் எதுவும் செய்வதற்கில்லை

என் முகம் இழந்த உடலோடு

முகமூடி அணிந்து பேச முடிவதில்லை

ஊமையின் வாய் அசைப்பில்

பேச்சு வருவதில்லை

இந்தத் தேடலின் முடிவில்

நான் சிக்குவதில்லை ...