காலம்

இல்லாத எதிர்காலத்தை

இறந்த காலத்திற்கு

கடத்திக் கொண்டிருக்கிறது

இருந்து இல்லாமல் போகும்

நிகழ் காலம்

"நேத்து போய் அந்தச் சட்டை வாங்கி

உனக்கு நாளைக்குத் தரேன்" என்றபடி

பொம்மையிடம் பேசிக் கொண்டிருந்த

குழந்தையிடம்

காலம் குழம்பிப் போகிறது

 

தூய அன்பு

 

இருத்தலில் உணரும் அன்பும்

செயலில் உணர்த்தும் அன்பும்

நினைவில் உருகும் அன்பும்

சொல்லில் உதிரும் அன்பும்

ஒன்றல்ல

ஆனால்

காது பொத்தி நந்தியிடம்

சத்தமாய் சொல்லும் குழந்தையின்

தூய பிரார்த்தனைக்கு ஒத்தது

இவையாவும் 

அன்பு

யானையைப் போல

வளர்ந்து நிற்கிறது

உனது அன்பு

அதன் நிழலில் 

படுத்து உறங்கும் பாகன்

எனது நம்பிக்கை 

பனிக் குடத்து நீரில்

மூச்சுத் திணறுவதில்லை 

உன் அன்பும் 

உன்னோடு இருக்கும் போதும் 

அப்படித்தான்

நினைவின் நீட்சி

மாலை நேரம் ஜன்னல் வழி
என் கையோடிருக்கும் தேநீர் கோப்பையில்
நிரம்பி வழிகிற உன் நினைவை
எதைக் கொண்டு பிடிப்பேன்

நாம் ரசித்த பாடல் ஒன்று
இன்று தனியே நான் கேட்கும் போது
செவியில் பாடும் உன்  குரலை 
எதைக் கொண்டு தடுப்பேன் 

தாய் தேடி ஓடும் சேய் போல
நித்தமும் உனைத்  தேடி ஓடும் 

என் கண்ணீரை
எதைக் கொண்டு நிறுத்துவேன்

பெரு மழையில் நனைகையில்
நெஞ்சில் பிசுபிசுக்கும்

உன் முகத்தை 
எதைக் கொண்டு உலர்த்துவேன் 

தனிமையின் சுவற்றில்

பல வண்ண ஓவியங்கள் வரையும்

நீ சொன்ன கனவுகளை 

எதைக் கொண்டு கலைப்பேன் 

உனைப்  பற்றி எழுத மறுக்கும்

மனதை மீறி வந்து விழும்

இந்த கவிதைகளை
எதைக் கொண்டு அழிப்பேன்

காதல்

ஓர் நீர்க்குமிழிக்குள்  சிறைப்பட்டு

காலமும் தவம் கிடப்பது

இதழ் விரியா மலருக்குள் சிக்கிக் கொண்டு

உள்ளூற மணப்பது 

சேவலின் தொண்டைக் குழியில் சூல் கொண்டு

அதிகாலை வெளிவர மறுப்பது

நீருக்கு வெளியே குதித்த மீன் மீண்டும் நீர்ப் புக மறுத்து

காற்றோடு பறந்து வாழ எத்தனிப்பது

பலூனில் மாட்டிக் கொண்ட காற்றாய்

சீமைக் கருவேலமரக் காட்டில் பறப்பது

பிறந்த சிசுவின் கைகளில் மாட்டிக் கொண்ட விரலாய்

எடுக்க முடியாமல் மயங்கி இருப்பது 

உதை வாங்கி‌ விரட்டப்பட்ட நாயாய்

மீண்டும் எஜமான் வீட்டு வாசலிலேயே தவம் கிடப்பது

இப்படி எளிதாக 

விட்டு விடுதலையாக வாய்ப்பிருந்தும்

தானாய் முன்வந்து அழகாய் 

சிலுவையில் சிறைப்பட்டுக் கிடப்பது காதல்

குளம்

Swathi Mutthina Male Haniye (2023 kannada-என்ற கன்னட படத்தில் வரும் ஒரு கன்னட கவிதையின் தமிழாக்க முயற்சி இது . இணையவழி இந்த திரைப்படம் பார்த்ததால் ஆங்கில வசன வரிகள் (subtitle ) இந்த கன்னட கவிதையை புரிந்து கொள்ள உதவியாக இருந்தது 

அன்று போல் இல்லை 

இன்று இந்த குளம் 

அப்போதெல்லாம்

இந்த சகதி பாசிகள் இல்லை  

அதிகாலை நடை பயில வரும் பனியுடன் 

மெலிதாய் சலசலத்து பேசிக்கொண்டு இருந்தது

நண்பகல் சூரியனின் பிம்பத்தைக்  கண்டு 

கண்கூசியபடி ரசித்துக்கொண்டிருந்தது

இரவில் வரும் 

நிலவையும் நட்சத்திரங்களையும் 

தன்னில் தாலாட்டிக் கொண்டிருந்தது 

ஆம் 

இந்த குளம் உயிர்ப்புடன் இருந்தது  

அன்று போல்  இல்லை

இன்று  இந்த குளம் 

வெகுகாலமாக மேய்ச்சல் நிலத்தில் தவழ்ந்து கொண்டிருந்த

குளிர் காற்றை ஆரத் தழுவிக் கொண்டிருந்தது 

பின் ஒரு கடுங்கோடையின் வெயிலில் ஆவியாகி 

தன்னை நிர்வாணமாக்கத் தொடங்கியது  

இறுதியில் சுட்டெரிக்கும் வெப்பத்தையும் அது தந்த காயங்களையும் 

ஏற்றுக்கொண்டு அமைதியாகத் தொடங்கியது  

இன்று குளத்தில் நடந்து சென்றால் 

இருப்பதெல்லாம் சேரும் சகதியும் 

ஆனால் அன்று குளம் 

இது போல் இல்லை 

அது  உயிர்ப்புடன் இருந்தது 

அன்று பார்த்தது போல் இல்லை

இன்று இந்த குளம் 

ஆனால் ஏனோ சில காலமாக

இப்போது போலவே 

எப்போதும் இருக்கக் குளம் எண்ணியது 

வெயிலுக்கும் மழைக்கும் மாறி மாறி 

மாறுவேடம் போட அதற்கு விருப்பமில்லை 

 

எப்போது மாறாமல் 

மூடுபனியுடன் கிசுகிசுக்காமல் 

சூரியனுடன் காதல் உறவாடாமல் 

நிலவையும் நட்சத்திரங்களையும் 

நினைவிலும் தேடாமல் 

இருக்கவே குளம் விரும்பியது 

ஒருவேளை 

மூடுபனியிடமும் 

சூரியனிடமும் 

பேசும்போது 

தன்னை தொலைத்து விட்டால் ?

இல்லை , குளம் தன்னை இழக்கக்கூடாது 

இப்போது போலவே எப்போதும் இருக்கவேண்டும் 

பழைய நினைவுகளின் சவப்பெட்டி மேல் 

பூக்கள் துளிர்விடுவதால் 

அது உயிர்ப்புடன் இருப்பதாக நம்பிக் கொண்டிருக்கிறது 

ஆனால் 

இந்த சேறு சகதி 

மக்கிக்கொண்டிருக்கும் இலைகள் 

தூக்கிப் போடப்பட்ட ஷாம்பூ பாக்கெட் 

எதுவும் உயிருடன் இல்லை 

ஜீவன் இருப்பதற்கான ஒரு அறிகுறியுமில்லை 

மன்னித்து விடுங்கள்  

அன்று போல் இல்லை 

இன்று இந்த குளம் 

அழகிய நாட்கள்

தாயின் அரவணைப்பில்

தூங்கிய குழந்தை
தாய் விலகிய பின்னர்

நீண்ட நேரம் கழித்துத்

திடுக்கிட்டு விழிப்பது போல
வாழ்வின் அத்தனை அழகிய நாட்களும் 

நம்மை விட்டு விலகிய பின்னர்
நினைவுகளில் விழித்துக் கொள்கிறது ...

தொலைதூர விண்மீன்களாய்

 கால வெளியின் அண்டத்தில்
ஆங்காங்கே சிறு புள்ளியாய்

புன்னகைக்கிறது நம்மைப் பார்த்து
அழகிய நாட்கள் ..